Munaasabaddan weyn waxaa ka soo qeybgalay Madaxweynaha Dowladda Koonfur Galbeed Soomaaliya mdane Cabdicasiis Xasan Maxamed (Laftagareen), Wasiirka Caafimaadka DFS mudane Dr. Ali Haji Adam, Wasiirka Wasaaradda Caafimaadka DKGS mudane Said Ahmed Ali, Wasiir ku xigeenka Wasaaradda Caafimaadka Dr. Hussein Mohamed Dahir, masuuliyiin ka tirsan Xukuumadda Federaalka Soomaaliya, xildhibaano ka tirsan labada aqal ee DFS, masuuliyiin ka tirsan labada gole ee DKGS, Agaasmiyaal guud, maamulka degmada, odayaasha dhaqanka, hay’adaha bahwadaagta la ah Wasaaradda, shaqaalaha Wasaaradda Caafimaadka uu hogaaminaayo Agaasimaha Guud ee Wasaaradda Caafimaadka mudane Dr. Ibrahim Adam Ali (Somow).
Waxaa si rasmi ah xariga uga jaray xafiiska cusub ee Wasaaradda Caafimaadka madaxweynaha Dowladda Koonfur Galbeed Soomaaliya mudane Cabdicasiis Xasan Maxamed (Laftagareen), oo ay weheliyaan Wasiirka Caafimaadka Dowladda Federaalka Soomaaliya, Mudane Dr. Ali Haji Adan, Wasiirka Caafimaadka Dowladda Koonfur Galbeed, Mudane Said Ahmed Ali.
Inta ay socotay munaasabada waxaa qudbado kala duwan madasha ka jeediyay masuuliyiin kala duwan iyaga oo bogaadiyay dadaalka madaxda Wasaaradda iyo Madaxweynaha DKGS ugu jiraan horumarinta adeegyada bulshada.
Wasiirka Caafimaadka DKGS, mudane Said Ahmed Ali oo munaasabada ka hadlay ayaa sheegay in xafiiskan cusub ay qeyb weyn ka tahay qorshaha wasaaraddu ku doonayso inay ku xoojiso maamulka dowligga ah iyo iskuduwidda howlaha Wasaaradda ee adeegyada caafimaadka bulshada isaga oo u mahadceliyay hay’adaha maalgeliyay mashruucan iyo taageerada joogta ah.
Dhankiisa, Wasiirka Caafimaadka Dowladda Federaalka, Dr. Ali Haji Adan, ayaa bogaadiyay dadaalka ay Wasaaradda Caafimaadka Dowladda Koonfur Galbeed ku bixisay horumarinta caafimaadka, isagoo xusay in dhismaha cusub ay sare u qaadi doonto hannaanka shaqo iyo isuduwidda adeegyada caafimaad ee degmooyinka iyo deegaanada KGS.
Ugu dambeyn, Madaxweynaha Dowladda Koonfur Galbeed Soomaaliya mudane Cabdicasiis Xasan Maxamed Laftagareen oo khudbad uu ka jeediyay munaasabadda ku tilmaamay xaruntan cusub ee Wasaaradda Caafimaadka inay tahay astaanta horumarka ay Dowladda KGS ku tallaabsanayso gaar ahaan dhanka adeegyada bulshada. Wuxuu hoosta ka xarriiqay muhiimadda ay leedahay in la helo xarumo tayo leh oo lagu maamulo adeegyada bulshada.